عيشة المغبون

يقولو الشراب حرام ، ويقولو الشراب يقلل من الهمة ، وقالو الشراب يضر ، وقالو زادا الشراب خراب ، يسألوك علاش تشرب ، اما ما يقوللكش علاش ما تشربش كي الواقع متاعنا واقع مريض حتى النفس فيه بالباي ، لا الوضع يزهي و لا الاخبار تفرح ، لا عبد يضحك ، والكلام ما يفيدش وخلاف الهروب ماعندك حتى حل ، والهروب من هالبلاد صعيب ، وقتها تولي تهرب من الواقع خير ما اخرتك مدلدل في حبل هارب من الدنيا .. 

هوني البحر رافض سفينتك و بموجو رماها على الحجر تكسرت ، بقات دخل في الماء و كل يوم تزيد تغرق ومغطي عين الشمس بالغربال و تقول بش نوصل ، و انتي اصلا من بلاصتك ما تحركتش .. قد ما جذفت الريح جاي عكسك يرجعك الف خطوة كل يوم ، كيف المجروح الي معقم جرحو بالماء فرق ويقول هاني نداوي ، بالعو خيط وتقول صاحي ، كان جات لكتيبة فيها قيمة راي ما تتباعش في القاعة في الشوارع والتصوير ارخص منو بياسر ، ما تقصش على كلامي وتعاود تسألني علاش تشرب ، مازلت نجاوب ، كيف الخير ما تلقاهش وكيف الشر ما تلقاهش كيف تتدفن كيف حي ماعندك فاش تعمل ، كيف محلك اي حد غيرك ينجم يعبيه ، كيف بلاصتك اصلها متع غيرك ، كيف ما عندك شي من الدنيا اما تسأل الدنيا شتحب مني ، كيف تصعب عليك صلاتك و يصعب عليك فسادك، كيف يكثر لكلام لي داير بيك ، كيف حد ما يفهمك ، و لي يفهمك يفهمك بالغالط ، والصحيح يتكذب و الكذب يتصدق، بضبط كيف المحكوم بالإعدام يقنع في روحو عمل بش ما يحسش روحو مضلوم .. وقتلي تولي كيف العرس كيف الزنانزة الزوز ما تمشلهمش و لا من يزورك ولا تزور لا ميت لا حي، الدنيا اصعب ملي تتصور ، ممكن انتي تراها محلاها خاطر تحبها محلاها ، ولا ممكن خاطر عشتها محلاها ، ولا حتى عشتها، انا مازلت ما عشتش ، بين خدمة وحبس دار عديتها وكملتها هارب منها بالشراب ، لين ولى عشيري ، كل كعبة شربتها حكيتلها حكاية وكل كعبة عندها حكاية خلاتني نشربها ، نحكيلها وسعات نسبها ونتغزل بيها ، منيش مهبول اما حاول تموت و انتي تتنفس ، تخزر وما تتكلمش وتتكلم ما تتسمعش ..