واقف ...

ياخي شبيني؟؟ لا نجمت نرجعلك ولا نجمت ننساك .. برودك يهبلني .. يجرحني .. يذبحني .. يقتلني بالعرق بالعرق .. ووجودك يسكتني يعميني ينسيني الدنيا وما فيها .. حرت وإستحرت وما لقيت وين نقبل وجهي .. يا ويلي نتفكرك .. يا ويلي ننساك .. ويقولولي كلمها .. إمشيلها .. إجريلها ، نقلهم كرامتي وعزت نفسي ، يقولولي ياخي وين عايش؟ مازالت ناس تخمم هكا ؟ نقلهم يمكن ماعدش فما .. أما أنا باقي .. ما نجمش نسلم في روحي ، نبيعها بالرخيص .. طول عمري نفسي عزيزة وعلى شكون نرضى .. عذبت قلوب وقهرت بنات أما انتي ... انتي ما لقيتلك دواء .. نسئل روحي زعمة خاطر نحبك ؟ ولا خاطرني بعدت الفراق عامل فيا وفترة وتتعدا وننسى ؟ كيفاش ننسى ؟؟ وانتي إلي تعرفني .. حافظتني .. دارستني علاش نمشي وعلاش نجي .. أما انتي بالنسبة ليا، صبورة كحلة مشتاقة لريحة الطباشير، ورقة بيضاء تستنى في القلم يخطها، متشوقة لحبر يغذيها .. زعمة أنا هوا؟ ولا واحد آخر حليتلو كتاب قلبك وكي خرجت سكرت الباب بالمفتاح ؟ نحب نتعلم نقراك رواية، نعرف أسرارها وأخبارها ونخلي عليها بصمة يدي باش يجي نهار وتتفكرني وتحس بيا .. نحب نرقد .. نغطس .. نغرق ونبات نحلم فماش ما نشوفك ونملي منك عينيا ونطير وحشتي إلي عندي عام كابتها .. العمر تعدى والوقت وفى وأنا مازلت كيما أنا واقف نستنى والترينو فات والفرصة تعدات والدنيا جرات وأنا واقف ...