سي المثقف وسي المتعوس

كان يا مكان في زمان من الزمانات في "بلاد الموز" و بالضبط قي قرية "البانان" زوز قرودة بطّالة .. لا خدمة و لا قدمة .. الاول منحوس ومستّك واسمو "قردان" والثاني اسمو "سعدان" وكان قاري ومتثقف ومعتبر روحو المحظوظ في كل شيء .. النهار الكل وهوما راكشين يا يبزنسوا في "قردات" الحومة ، يا يقطعوا ويريشوا في الي ماشي والي يتسلق .. 

فمة نهار قاعدين فوق شجرة تلفت "قردان" لصاحبو وقالوا:

-برجولية يا معلم قتلني الروتين .. كل يوم نفس الحكايات .. والله كان باش نبقى كي هكا باش نطيش روحي من أول شجرة

-آش رايك نمشوا للفيرما الي بحذانا نسرقوا شوية موز خاطر هو ما بقاش برشا مخزون" 

-أوكي مشات معاك 

من حينهم خرجوا ومشاو للفيرما .. سي المثقف والمحظوظ  طلع فوق الشجر باش ينحي الموز .. وسي المتعوس بقى لوطى باش يلقف الموز.. كان الامر كذلك .. المحظوظ يقول "يزينا" و "قردان" يقولوا "زيد يا ولدي راجلها في ليبيا".. هوما هكاكا ياخي خرج مولا الفيرما هرب المحظوظ و تشد "قردان" المنحوس وطاح مولى الفريما يضرب فيه لا شفقة لا رحمة لين هبّالو أجنابو ونسّاه في حليب أمو.

اليوم الثاني قالو أكيد اليوم ما نتشدوش وهيا نعاودو نفس الفازة ياخي كالعادة تشد "قردان" وكلى كي العادة 

النهار الثالث تعاودت نفس الفازة.. 

النهار الرابع"قردان" قال لـ"سعدان": 

-يا معلم طبت من الضرب كل نهار طريحة معادش يساعدني الوضع هذا .. كل ليلة تبات لعزوزة تكمدلي بالماء والملح .. أسمعني المرة هاذي انا الي باش نطلع الفوق نقص البانان و انت تبقى لوطى تجمع الي انهبطهولك". 

-آباي يا "قردان" يا خويا توا هذا كلام؟؟؟ بالطبيعة الي تقول عليه انت مبروك..." 

كان الأمر كذلك "قردان" الفوق يقطع و"سعدان" لوطى يجمع ياخي خرج مولى الفيرما لقاهم يسرقوا كالعادة بدا يجري وفي عوض يشد الي تحت الشجرة كي الايامات السابقة خاطرو أسهل .. طفاه المرة هاذي ومشى يجري وراء الي فوق الشجرة لين شدوّ وقالو:" تعرف لواه كبشت فيك و شديتك؟؟؟ خاطر الى لوطى من الشجرة ديما ياكل في الطرايح و انت ديما فاصع عاد قلت المرة هاذي الا ما نجيبو ولد الكلب الي فوق انحيلو وعدو" وأعطاه طريحة متع نباش القبور مساوية لطرايح الأيامات الثلاثة الي فاتو.

أيا ما نطولش عليكم بعد ما كلا "قردان" ما تيسّر من الضرب روح لشجرة اللقاء محسوب يزحف موش يمشي .. يلقى صاحبو متكي على غصن ياكل في كعبات كاكاوية ويعدي بالتاي .. كي شافو ضحك و قالو

-أه يا "قردان" يا خويا آش صارلك؟ و الا كالعادة؟؟"

-على ما يسعد المنحوس كان يكون عمرو فرغ .. و أنا منحوس من يوم ما ولدتني أمي"

-لا عاد ما تقولش ها الكلام .. تي كلها تجارب وتفيدك في الحياة و تقوي شخصيتك .. أقعد توا نصبلك كويّس تاي تعمر بيه الطّاسة توا تنسى كل شيء"

-آش نقعد يا "سعدان" يا خويا؟؟؟ أنا من قبل هبيت من القعدة والبطالة وزيد بعد الضرب هذا لازمني نلبس الكوش متاع الصغار فماش ما انجم نقعد .. أما إنت مقوى زهرك كان الفوق و الا لوطى"

-تي بربي يزيتش من المبالغة .. آش تضربت انت مقارنة بجدودنا؟؟؟ و كلو في سبيل العلم والاكتشاف و باش أحنا توا نكونو القرودة الي أحنا عليها توا"

-آباي!!!! كيفاش؟؟؟ أحكيلي..."

-أيا يا سيدي المرة الي فاتت نتفرج في في قناة "ناشيونال جيوغرافيك " جايبين برنامج على تاريخنا وعلى القرد الأول الخ الخ ... أنا الحق شد انتباهي تفصيل بسيط .. ياسيدي أحنا ما كوناش الي نحكموا في الارض .. لكن كان فما مخلوق آخر كان أذكى منا اسمو "الانسان" .. الانسان هذا بلغ درجة كبيرة من الذكاء والنرجسية والانانية لين وصل دمر روحوا وانقرض وقريب يقضي على الكوكب .. تي معليناش فيه ماهوش موضوعنا توا لعل نحكيلك عليه مرة أخرى..."

-برجولية يا "سعدان" يا خويا معلومة أول مرة نسمعها .. هيه كملي ما كنتش نتصورك مثقف للدرجة هاذي.."

-يا سيدي الانسان هذا كان هو الاذكى ونحنا القرودة كان يجرب علينا في التجارب العلمية .. الحقيقة انا ما دخلتش مخي الحكاية أما باش نحكيلك الحكاية كيف ما تفرجت عليها في "ناشيونال جيوغرافيك "...الحصيلو مجموعة من علماء البشر حطو 5 قرود من جدودنا الاوائل (الي تماثيلهم في شوارعنا) في قفض وحطوا سلّوم وفوقوا يرشا موز. في النهار الأول طلع قرد السلوم باش يهز الموز ياخي العلماء ضربوه بعصا و بعد ما كملو معاه مشوا للقرود الاخرين ضربوهم زادة .. اليوم الثاني تعاودت نفس الفازة مع قرد آخر المرة هاذي رشوه بالماء البارد برشا وبعد كملوا رشوا بقية القرودة .. الحصيلو في كل مرة يطلع قرد السلوم باش يهز الموز يا يضربوه و بعد يضربو البقية ، يا يرشوه بالماء البارد و بعد يرشوا البقية."

-هيه يا "سعدان" يا خويا و آش صار بعد؟؟؟"

-بعد فترة بسيطة ولى كل قرد يطلع باش يهز الموز،البقية يمنعوه  ولا يضربوه باش ما يترشوش بالماء البارد ولا ضربهم ... بعد مدة من الوقت ماعادش حتى واحد من جدودنا يتجرأ أنو يطلع هاك السلّوم مرة أخرى .. بعد مدة من استتباب الأمن قرر العلماء أنهم يخرجوا واحد من القرودة و يحطّوا قرد جديد .. عاد أول حاجة يعملها القرد الجديد انو يجي يطلع السلوم باش يهز الموز لكن و فورا الاربعة القرود الاخرين يهبطوه ويضربوه ويمنعوه من أنو يطلع مرة أخرى .. و بعد برشة محاولات وبرشة طرايح يفهم القرد الجديد انو ما يلزموش يطلع السلوم ومن غير حتى ما يفهم السبب علاش .. و بعد مدة العلماء بدلوا قرد من القدم بقرد جديد و صارلو كيف ما صار للقرد البديل الأول حتى أن القرد البديل الأول شارك زملاءه بالضرب وهو ما يعرفش علاش يضرب .. و هكا حتى تم تبديل جميع القرود الخمسة الأوائل بقرود جديدة ولكن السنّة تواصلت كيما هي .. القرود تضرب كل من يحاول يطلع السلوم وحتى حد منهم ماهو عارف علاش!!"

-برجولية يا "سعدان" يا خويا ما كنتش نتصور انو تاريخنا مليان بالضرب هذا الكل وعلى رايك آش تضربت أنا في سبيل اني نتعلم درس"

-ههههههههههههه يا "قردان" يا خويا الفايدة كي تعمل حاجة أعرف علاش تعمل فيها وما تكونش كي جدودنا الي استعمرهم البشر لهذه الأسباب .. الروتين يقتل عقولنا ما تستسلمش وواصل المحاولة"

-واضح الدرس اما ماذابيا موش الضرب ديما عندي .. لازم شويية عدل مرة أنا ومرة إنت وفي الأخر نقلك

ترشفني وما تجغمنيش .. إنت تحيا وأنا نعيش"​