تڨازة ..

-شبيك وحدك ..؟

-الدنيا من بعيد محلاها يا ميمتي .. 

-أقرب وليدي و شوف مابهاها.. 

-جربت تقدمت خطوة و هربت .. !

-الحب؟

-أمي و خواتي هوما الدنيا و ما فيها .. اصلا بعد كل حكاية نلقاهم كان هوما ..

-العشق؟؟ 

-صفحة من حياتي و قطعناها.. 

-الوجيعة ؟؟

-هي .. 

-شكون ؟ هي ؟! 

-هي ماكيفها حد .. زين و وهرة شباب و قدها قد.. 

-أحكيلي .. 

-هي ساكنة في القلب .. في الروح .. وفي العقل .. هي دمع بكايا وجرحي وشفايا .. هي ضحكتي .. فرحتي .. قوتي وهنايا .. نتزعبن .. نترهدن .. نتسكبن .. نتدلل .. على شكون غيرها في هوايا نتفنن .. هي الي عماتلي العين .. عيشتني في حلمة والنوم كان طويل .. هي حكاية مشى في بالي طويلة طلعت سطر .. اييييه زعما قداه من كلمة يهز السطر !! 

-القلب وما يريد والي يتبع قلبو وليدي يتقطعلو حبل لوريد .. أنسى الي فات أنسى الي تحبها و شوف الي تستحق .. 

-تعرف النار كي تشعل تحرق الأخضر واليابس والكره كي يكبر يقتل لمحبة .. وانا كرهت نحكيلك على حروف أنا فيها تسرقت .. أيامات من عمري خسرت .. يا ميمتي الدمع عماني .. ليلي طويل  ما نجمت الي في بالي ننسى .. وجعتني والوجيعة بقاتلي كيف الغصة .. نسقي سواني بدموعي والدموع ما تكف .. نهدي حبي للي قلبو دوني والحب ما يكف .. نعطي جرحي للتراب ضحية والجرح ما يكف .. يا ميمتي راهي شواتني .. وبعدها كواني ..

-وليدي فنجانك مقلوب وحكايتك ولات في المكتوب .. خلي فلوسك عندك وأمسح دموعك .. غدوة الدنيا تضحكلك و تزهى اوموروك 

-على ربي يا ميمتي .. هيا بخاطرك ..

-ربي معاك ويحنن القلوب الكاسحة عليك

-آمين .. هيا في الامان