الانسان تعيس بطبعه

الحكاية بدات بالظبط اوائل الثمانينات وما نتذكر منها كان انا نبكي والناس فرحانة والنساء تزغرط .. الناس الكلها تضحك فرحانة كان انا ننوح وقالبها الدنيا بالعياط وانا نرا فيها بالمقلوب .. نهارتها الطهور .. الحاصيلو ملا عالم جيتو .. ياخي هكة يستقبلو العباد!!!

بداية مش هي بصراحة ..

الحاصل هكة كان اول ذكرياتي مع الدنيا 

من اولها وانا نجري ونجرّي 

اقرا باش تفرح .. نعدي عام كامل نقرا وساهر الليالي ونقوم مالفجاري وانا راسي مكبوب على كراسة وآخر العام كي ننجح نفرح نص ساعة بالحساب وتوفى غادي .. كل عام نفس الحكاية ..

كبرت وشفت الدنيا وعرفت انو الفرحة تتقاس بالدقايق والهم يتقاس بالاعوام وساعات يعيش معاك لين تموت .. تي لا علينا .. المهم مالصغرة دارنا قالولي اقرا .. علاش  .. باش تنجح .. لواه .. باش تخدم خدمة باهية .. اي لواه .. باش تخلص بالڤدا .. ولواه نخلص بالڤدا .. باش تنجم تعمل على روحك .. لواه .. باش تعرس .. لواه .. باش تجيب صغار .. باهي يعني نعمل هذا الكل الي مازلت ما لقيتش حتى امهم؟ وشكون قال نحب نعرّس؟ شكون قال الي انا نحب نجيب صغار!؟ علاه ما سألونيش في الحكاية ؟ باهي انا وين في الحكاية!!!

يعني نتعب حياتي كاملة باش نفرح بهاك النهار الي نولي فيه بو؟ ونزيد نخدم باش هوما يرتاحو ؟ يعني كل واحد يخدم باش يفرح الي جاي في الثنية .. ملا رسالة في الحياة .

كي جيت نحلل فيها الحكاية نلقى انو انا نحاول ننجح باش نفرح ..

نشري حاجة جديدة باش نفرح

نخرج باش نفرح

نرتاح باش نفرح

نتفرج في فيلم باش نفرح

يعني اصلا انا مانيش فرحان ، آما نحاول نفرح وديما تكون محاولات فاشلة .. ظاهرلي هاكة علاه العباد ديما وجوهها مقلوبة ومتغششة من ربي هكاكة .. يعني الانسان تعيس بطبعه .. يعني جيت للدنيا هذي باش نكون تعيس حتى تجي حاجة تفرّحني دقيقتين ولا ثلاثة ونرجع كيما كنت وتقعد نفس الحكاية تتعاود ..

علاه مش بلعكس نكونو ديما فرحانين وعاملين جو وكي تصير مشكلة نتقلقو شوية وبعد نرجعو فرحانين كاينو شي ما صار !!

في وقتنا الحالي ولينا نحاولو نشريو السعادة بالفلوس .. يعني خدمة باهية باش تخلص برشة باش تنجّم تفرح برشة وهذاكا علاه الزوالي ديما تعيس وهاك الكذبة متع السعادة ما تجيش بالفلوس ما فماش منها .. وباش تفرح اكثر يلزمك تخدم اكثر وتدخل فلوس اكثر الي باش تكون في لخر هي سبب فرحتو .. يعني تبدل وقتك فلوس .. تخدم عام باش تشري كرهبة .. وشهر باش تشري تليفون وجمعة باش تشري طرف حوايج .. ونهار باش تنجم تخرج تعمل قهوة .. يعني تبدل ايامات من عمرك باش تنجم تشري حاجات تفرحك .. يعني تعطي نهار من عمرك لعرفك باش عرفك يبدلهولك فلوس باش تنجم تشرب قهوة .. يعني الفلوس هي ايام من عمرنا .. كي تدخل تشري وكي تخلّص راك تخلّص ايامات وسوايع من عمرك باش تعوضهم بمريول ولا سروال تلبسو ايامات وتلوحو .