فترة نقاهة

 مخنوق ولا عاد عيني في شي .. لاعاد انجم نتعامل مع عباد ولا انجم نحكي معاهم .. كلمتين على بعضهم ما انجمش نقولهم من غير غش ولا تنرفيز .. وليت تلزيت باش نبعد خير ما نزيد نكرههم فيا .. نعرف ماهوش حل اما هذاكة ابرك حل وابرك حال .. بأنقص مشاكل وستراس وتنجموا تقولوا استانست .. استانست نسكت كي المشاكل تكثر .. نحكيهم بيني وبين روحي ونستشيرها واغلب الاوقات تتحل وما يسمع بيها حد .. هكاكة ما يتشمت فيا حد وما يتمزى عليا حد .. صنعة ملي انا صغير استانست ما نضوي شي وأي حاجة خايبة تصير ندفنها .. تدفن خير ملي تسمع حكايتك في التراكن .. اما كي كل شي في الدنيا .. الحل هذا فيه الباهي والخايب .. صحيح حكاياتي مدفونين في بير وما يمسهم حد .. اما المشكلة انو كل شي يجي مع بعضو .. مهما كانت الحاجة صغيرة تنجم تفرعسلك نهارك ولا ليلتك .. مخك يولي يخدم في برشة حاجات وبرشة اتجاهات فرد وقت .. حتى لين اعصابك تتحرق لدرجة ماعادش حامل روحك وكاره كل شي وبالطبيعة ما يحلالك شي .. الي يغزرلك يلقاك سارح وتخمم لكن حد ما يعرف شبيك وهذي حاجة عادية مادام اخترت اني ما نحكي لحد ومسكر على روحي ونعيش العالم متاعي وحدي .. 

الوحد خايبة ممكن .. اما باز خير مالقعدة مع اصحابك الاوفياء الي في لخر ما طلعوش اصحابك .. طلعو رحاية ڤمح وخونة .. بمعنى اصح "طحانة" وفي اقرب فرصة نساوك وباعوك .. 

الوحدة خايبة ممكن .. اما روحك هي الانسان الوحيد الي كي تجي باش تحكي معاه ما يتلفكش ويقلك عندي ما نعمل .. الي كي تحب تعمل معاه قهوة ما يخليكش مطيش تستنى فيه باش وفي لخر ما يجيش ويقلك ديزولي تشديت .. الي ديما معاك كل نهار وكل ليلة وما تستحقش بش تلوج عليه خاطر ديما تلقاه ..

ليلة مالليالي انا محنط هكة بالتخمام خذيت قرار باش ماعادش نخمم في غدوة وباش نبدا في فترة نقاهة .. كل مرة في بلاصة .. وكل مرة في بر .. كل مرة في بحر وفي اقل مالجمعتين ما خليت شي ما عملتوش .. تصبيحة عالبحر وعومة عقاب الليل .. دورة عالشط وغطسة الفجر .. منسي .. وحدي نمشي .. وحدي نقعد .. وحدي نقوم .. وحدي نعوم .. لين جا النهار الي قلتلكم عليه .. النهار الي تصير فيه حاجة تقلب كل شي .. وعلى قد ماهي تافهة الحاجة اما ما تفكرتهاش شنية بالظبط .. اما عملت هذا الكل وقلبت كل شي ولا عاد عامل جو ولا عاد حامل شي .. انتكاسة حقيقية ورجعت هاك الخنقة والفشلة والغمة والاحساس الي تحب تشد حاجة تكسرها والا تضربها عالحيط .. رجع هاك الاحساس الي تحب تعيط اما ما تعيطش خاطر تعرف الي ما فمة حد باش يسمعك .. رجع الازبهلال والسرحة والبهتة ورجع معاها كل شي .. رجعت الكآبة وغرقت فيها .. رجعت ما نحب نحكي مع حد وما نحب نحكي على شي .. رجع الاحساس بالفشل ولي حتى فترة نقاهتك وعطلتك فشلت ووقفت على زوز حلول :

-نكمل في الانتكاسة الي عايشها ونرضى بفشلها وما نعرفش وقتاش توفى 

-اني نفسخ ونعاود النقاهة من جديد

وقعدت الفوضى هكاكة في داخلي وبين تنهيدة وتنهيدة تنهيدة .. بين السيڤارو والسيڤارو سيڤارو .. الفدة والڤلڨ هوما السبب في تشعيل الاول مالثاني والثالث مالثاني .. وكل تشعيلة معاها حكاية .. كل تصنديرة معاها حكاية وكل نفخة بحكاية وفي وقت الشردة تعيش المعنى الحقيقي للهجة من هالعالم المقزز المقرف وتتهنى بوحدتك .