حلمة

وقت يسرقني السكات ونبعد عالدنيا وما فيها ما نحب شي يرجعني ليها .. السكات طبيعة عندي وتواتي ساعات هكة نحب ناخو بوز منها .. نحب حاجات بسيطة اولهم لحظة هدوء مع روحي .. 

نعرف مش ساهل تبعد كي تتخنق  وتحس اكة الاحساس الغريب متاع الضياع والوحدة والدراما والكبي الي يهبط عليك .. شي ما يحلالك وما تحب

تكلم حد لكن حد ما يهني عليك .. الغريب زادا انو في الوقت الي انتي حاجتك بشوية سكات الناس الي دايرين بيك يظهرلها تحب تحكي ومهما كانت حلاوة حديثهم الا انك تحسو ماسط ..

الكلام هذا حبيت نكتبو في بروفيلي لكن حد ماهو مصدق انو حكايتي القديمة وفات مع وتسكر آخر باب وآخر قهوة لمتنا وآخر كلمة قلت هنيني عليك وعطيتها بالظهر ومشيت ومن وقتها هاني نقدم بالشوية بالشوية في الي مازال من هالعمر .. نصنع في الفرحة ونخلق في الضحكة .. ماعاد نستنى في حد يرجع وفهمت الي حد ماهو باش يجي ويكونلي الفرحة الي تمنيتها سنين .. حد ماهو باش يجي وياقف معايا لوجه الله .. حد ماهو مش يعطيني أمل في غدوة .. كل حكاية اصعب من اختها .. 

يمكن انا مصعبها على روحي خاطر نحسبها  وتنجمو تحسبوها كيفي كي تسألو شنوا مصير عقة تربط صانع قهواجي ما كملش تعليمو الثاناوي بوحدة عندها المتريز ؟ هذا فارق بسيط تنجم تتجاوزو خاطر الثقافة عمرها ما كانت  مؤهل

علمي او شهادة .. لكن فمة فرق بين دار وفيلا وعمارة ولي بوها عندو شركة ولي بوها خبير عدلي وبرا عاد شوف شكون ترضى تهبط من كر

هبتها وترضى تمشي معاك على ساقيها وحتى اذا هي رضات هل دارهم يرضاو؟ 

هذي عينة مالوضعيات الي تحطيت فيها ونخمم فيها وقد ما حسبتها ديما في النهاية نلقى روحي نظهر في صورة الطامع وانا عمري لا كنت طماع او طمعت في بشر او مديت ايدي لطفلة ..

الطبيعة هذي نعرف الي هي خايبة وعملت فروقات وحواجز بيني وبين برشة بنات عرضتهم في حياتي اما الي تفهمها تتعايش معاها وتقبل بيها وبالتالي تقبلني كيما انا .. 

الي تبدل في حياتي انو حسبت وحدة منهم حلمة برغم كل الفوارق الي بيناتنا .. صحيح هي وخرت برشة حتى الفرحة معاها ما نجمتش نتبننها  ونعرف الي اذا مشات مش نعاود نفيق على واقع مر لكن انا مليت عيشة الراهب .. مليت عيشة الفيرتيوال .. مليت برد الوحدة وسكات الظلام  ووقت الفراغ الي ولى ما يتعبى كان بيها .. مليت نحكي عالماضي وحبيت حاضر هي فيه وتمنيت صوت توشويشة ودفى بدن  بلحن الضحكة معاها وحبيت نحس روحي حي معاها .. 

انا مجموعة فوضى احاسيس وافكار واهتمامات .. حروب الداخل وذكريات وفن وشوية من كل انسان

عرضتو في حياتي .. صحيح برشة نجمت نأثر فيهم لكن مستحيل بأي طريقة نملكو او نستغلو  .. 

لذا ما انجمش نقول خسرت انسان خاطر عمرو ما كان ليلي .. وهذي مالاول بدات مش ليلي ، معاها طرف ثالث مالكها ومستملكها ..

هي الوحيدة توا الي مش تفهم فاش نحكي خاطرها تعرف خوفي وغرامي وكل ماهو مخبي وما كتبتوش  .. اما تعرفو؟ كل ما نتذكرها نضحك .. غيرتها تضحك