شهر الصيام

رمضان وريحة سيدي رمضان بدات تفوح بما انو قرب وما بقالوش برشة .. انا قبل كنت مالناس البهالل الي تفرح كي يجي الشهر الفضيل .. الله غالب ماشي هكاكة بالنية ونقول شهر فضيل ، شهر عبادة ، شهر ماكلة وتمخميخ وسهريات ودبش ولمة .. شهر يولي الواحد عندو فايض متع حب وحنان للجنس البشري الكل ، شهر لربي وعبادو..
اما هوا طلع شهر هردة مش لعب وربي يفتح على من فتح علينا .. قالك يا سيدي العباد  تولي مستجرمة في هالشهر .. يكثر الاجرام وتكثر السرقة والبراكاجات والعرك بما انو الي تمسو تسمع حسو وقيد على حشيشة رمضان .. اللطف يا صاحب اللطف قالو شهر تسامح وشهر الفضيلة والعبادة ..  ونزيدكم زيادة الانتاج والانتاجية تولي في الحضيض في هالشهر الفضيل .. الي يسمع يقول الانتاجية في السما بخلاف هالشهر الفضيل والتوانسة حارقين رواحهم بالخدمة  وعادي تلقى واحد رامي روحو على كبوط كرهبتو ويهبط فيهم حيار خاطر حاسس بالذنب كونو فصع مالخدمة وغايضتو كيفاش مصالح المواطن تعطلت ..
واحد مالناس كنت نقول تبارك الله هاو الدولاب يدور  والتجارة ماشية والعباد تشري بالحاضر ولا بالكريدي او حتى بالسلف المهم هاو ماكلة ولبسة . . جهاز دار .. هاو خطبة .. هاو فاتحة .. هاو طهور وما نخبيش عليكم كان ماشي في بالي الاقتصاد يتنعوش وسيدي رمضان يحل ببركتو ع الخلق لكن الاحصائيات الرسمية تقول عكس هذا .
صحيح نشوفوا في التكركير والنوم في الادارات اما يا أخي فمة آية ولا سورة تقول من شهد منكم الشهر فليسهره؟ في بالي ربي كتب علينا الصيام والباقي تسهر ، تشطح، تسكر، تصوم، تفطر ، تعديه فوق سجادة امورك هذيكا وما ظاهرلي كان الاسلام حرم عليكم الخدمة بالعكس ، العمل عبادة واللي قلبو حارقو عالخدمة شكون شدو ولا ما فلحنا كان في التعلات؟ ايا سيدي تعرفو كيفاه ؟ رمضان مبروك على من صام وعلى اللي ما يصومش عالاقل هوكا يدبر بزايد ماكلة بنينة وسهريات وجو وربي يعيدو علينا بالصحة والعافية عالاقل الواحد يشبع من لمة العايلة