تخلويض قلم

الناس الي تعرفني في الدنيا الكلها لاحظت الي انا آفة متاع حاجة اسمها دخان .. الشي الي خلى اي واحد يعدي الرومارك متاعو عالحاجة هذيكا في اي جلسة وفي اي مكان .. فمة بنات كانت عندي بيهم علاقة وصلو يخيروني بينهم وبين الدخان وبما اني طاباجيست للنخاع اخترت الدخان بالرغم نعرف الي انا ماشي في طريق الانتحار البطيئ لكن عندي قناعة اني مستحيل نبطلو بعد عدة محاولات فاشلة .. 

ما نعرفش علاش ما نخافش مالموت .. علاش مادد روحي ليها وقاتلها بالدخان كيما برشة قالولي .. 

يمكن خاطر ما فمة حتى فرق ، هكة ميت وهكة ميت ، في الحالتين نتنفس كهو خاطر ماهياش هذي العيشة الي نحبها .. 

العيشة الي نحبها نحب كل بلاد نمشيلها بطيارة وكل جزيرة نمشيلها بفلوكة ، كل دولة ندورها بكرهبة وكل ولاية ندورها بموطور، كل حومة ندورها ببسكلات .. ساكادو على ظهري فيه مصورة ، ارديناتوري ودخاني بالطبيعة ..

قبل كي  كنت صغير كنت نطيش روحي عالقاعة ونعمل روحي ميت ، توا واقف على ساقيا وعامل روحي حي ..
كي كنت صغير كنت نسمع نغمة شناشن امي الي تفيقني كل صباح بلحن عمري ما سمعت احلى منو .. امي الي كنت نوعدها باش كي نكبر نغرقها في الذهب باش يبقى اللحن هذاكا، وكي كبرت لقيت دنيا اخرة وكل مرة فردة من هاك الشناشن تتباع.. هاو قراية ، هاو حوايج ، هاو غصرة علوش العيد ، هاو مرمة .. كل مرة حاجة والنغمة ماشية وتنقص وفي دولة ظالمة باقي اللحن مشى في المحامين والجعايل باش تاخو حقها في ورثها حتى كان خذاتو وماعادش فمة لحن صباحي .. قلتلها باش نردك صفرا بالذهب رديتها صفرا بالفجايع كيما اي واحد تربى وسط حومة عربي وفي عز طلعتو تغرم بالعرك والمشاكل مع الحوم لخرة ..
كي كنت صغير كنت نحب نكبر ونولي بطل نعاون كل واحد طايح .. طحت وما عاوني حد ..
كنت نطلع فوق عمارة وندلدل ساقيا ، نغزر للعباد صغار ، الكراهب صغار  .. نبدا فرحان وحاسس روحي ككانت مشكلتي نحب نكبر باش تولي عندي فلوس تصلح بسكلاتي ، باش نشري كورني ڤلاص ، باش نسافر البلدان .. باش نمشي وحدي لجدي من غير ما نستنى عطلة .. كبرت وبقيت في بقع
تعرفو؟ ما نعرفش علاش نحكيلكم !!
ممكن خاطركم تقراولي وتسمعوني .. ولاطركم بير غارق قد ما نفرغ ما يتعباش ؟
نتذكر مرة هبطت تصويرة راجل كبير يبكي وكتبت عليها صحة للي ينجم يبكي .. حبيت نبكي لكن ملي انا صغير قالولي الدموع مش متع رجال والراجل ما يبكيش .. اصلا كنت نخاف باش نبكي ، حتى كي مات عزيزي ما بكيتش خاطر هوا مفهمني ما نبكيش.. توا مستحق نبكي .. قد ما نعيط ولا نضرب شي .. حاسس الدموع هي الي باش تفرهدني .. خايف نهارة الي نبكي نعمى ، سنين ما بكيتش .. كان نبكي الا ما يوفى الما من عينيا . . بطبيعتي ما عنديش برشة ما فيهم .. وقعدت هكة لا نجمت نبكي ولا نجمت نهرب من واقع مر اكثر من قهوتي .. في دولة ما عنديش الحق باش نعيش فيها .. دولة ناس تاكل باش تعيش وناس تعيش باش تاكل .. وبالنسبة للموت مش عيب تخاف مالموت اما العيب تموت مالخوف ..