ايجا عندي

نحب نتكى عندك وبين ايديك ، تبنن بيا وتحنن عليا ، تحكيلي علي فاتني في حياتك ملي مشيت ڤتلني الروتين والعيشة ولات تافهة ، فارغة ، كنيني شاعل نار ، ما حلالي فيها حد غيرك .. خيالك كل ليلة يزورني في منامي ونتمنى كي نحل عينيا نلقاك بحذايا .. ويا خيبة المسعى كي نفيق وما نلقاكش نقعد محملة مخدتي نشم في ريحتك ونتذكرك كي كنت تجي بحذايا .. قاعدة على طرف السرير نتفرج على روحي في المراية .. نتفرج في رقبتي وحموريتها والبلايص الزرق الي مزينتها .. نمس شفايفي ونتفكر في شفايفك وبنتها  .. عينيك وغزرتها .. يدك وخشونيتها .. نتذكر حتى شواربك ودڤتها .. 

كي نتذكرك تاقف الدنيا وترجعلي الاوقات الحلوة وترجع النار تشعل فيا من جديد ونبدا نسب ونلعن في الوقت والناس والظروف الي خلاتك عليا بعيد .. نعنبوهم الناس الي حسدوني فيك وحسدونا في الفرحة .. نعنبوها من عيشة في البلاد العريبة ومجتمع العيب والممنوع .. ينعمبو هالبعد المشوم . ينعمبو السكات .. ڤلبي فلڤط مالكلام الي فيه مكتوم .. ونعدي نهاري منرفزة ووين نتفكرك نرتاح ونعدي بقية الليل نكتبلك .. ليك نحكي ومنك ومن بعدك نشكي .. نحبك اكثر من روحي شنعملك؟ نحبك كي تقلي نعشق ربك .. نحب طريقتك في الكلام ونصايحك .. نحبك بغشك وببرائتك .. بغيرتك الي ساعات تضحكني .. بتكريزك عليا .. نحبك كي نستفزك   وتتغشش .. نحبك كي نرا المحبة في عينيك .. كي تقلي انتي ملكي .. تقلي ما تخاف من شي هاني معاك ونعرف الي في اي وقت نطيح نلقاك .. حبيتك بجنبي نحكيلك خير ملي نكتبلك .. خاطر انتي ماكش كيفهم اصلا ما تتقارنش بيهم .. وعلى هذاكة نحبك ونعشقك .. معاك نحس روحي بنية صغيرة .. قداه نعشق جد ولديك .. ويا مخيبها دنيا بلا بيك .. اما قداه يقتلني سكاتك .. مش تقعد ساكت برشة؟

-كي تبدا تبكي ما نعرفش شنوا نقلك ..
-ما تقلي شي لا تجي تطبها تعميها

-ايجا عندي ، عنقني واسكت.