حب افتراضي

نتذكر اول مرة كي عملت بروفيل فيسبوك لتضييع الوقت ، لا خدمة لا ڤدمة ولا قراية .. وقت فراغ بزايد ، ما عملتوش للاصحاب اصلا كان صاحبي يفيق بيا يمكن يقتلني خاطر يحبني قطوسة مغمضة ، لا نغزر لا نشوف ولا عندي الحق نتعرف على غيرو .. حكاية طويلة وعذابها اطول ..

1. عملت فوبروفيل وبديت رحلتي الافتراضية بعيد عن اي علاقة او محاولة خاطر كنت نصد اي واحد يحاول يتقربلي .. قعدت لاهية بصفحات الموضة والريجيم كيما اي طفلة وشوية فن كي نبدا ما عيني في شي ..

جلبني عالم الفوبروفيل وجوو وبعض الاقلام الي فيه الي تكتب من واقعها ومن الواقع الط نعيشوه حتى لقيت روحي في كلام وحكايات واحد منهم وعمري ما تصورت روحي ترجع فيا بسبب كلام انسان وحكاياتو .. فمة حاجة شدتني ليه ، تعلقت بيه من غير لا نحكي معاه ولا شفتو مني ليه.. كل يوم كي نقوم مالنوم اول حاجة نعملها نحل باش نصقصي عليه ، شنية الجديد في بروفيلو .. لشكونحط جام .. وين مشى .. وقداه تشعل فيا النار كي يحط جام على تصويرة طفلة .. نبدا نسب فيه وفيها .. ما نعرفش علاش نغير .. ماهوش ليا باش نمشي نعاركو ونطالبو بحقي فيه .. وخاطرنا ما نحكيوش كنت نخاف لا نهار نفيق الصباح نلقاه فسخني .. نخاف لا نخسرو وهوا اصلا مش متاعي باش نخسرو .. نتوهم وحدي .. اخترعتو في خيالي وكنت نتخيل حتى في حوارات بيني وبينو .. حكايات وروايات كانت تنجم تدور بيناتنا .. حتى لين جا النهار الي كتب فيه حكاية ايدونتيك لحكايتي .. من غير ما نشعر مشيت حكيت معاه واعترفتلو انو الحكاية مستني وانها تشبه لحكايتي في البداية وفي برشة تفاصيل لكن مش في النهاية خاطر حكايتي ما وفاتش ..
بعد الفازة هذيكا قعدنا نحكيو وكل مرة نسألو سؤال من هاك الأسئلة البدائية متاع قداه عمرك ، منين ، اش تعمل في حياتك والفرحة الكبيرة اني لقيت روحي مرحب بيا كل ما نحكي معاه .. تخيلت في مخي الف حكاية .. تخيلت كيفاش كي نراه .. كي باش نسلم عليه .. زعمة نبوسو ولا باليدين .. زعمة نحملو ولا سلام من بعيد لبعيد .. وكل مرة نحكي فيها معاه نلقى روحي زدت غرقت فيه واحساس الغيرة يقوى مع كل جام وكومنتار يعملهم ولا تعملهملو طفلة ..

خفت لا نزيد نتورط فيه .. خفت لا نحبو .. ماو يقولو كان خفت لا تحب حد اعرف راك سايي حبيتو .. كيفاه .. علاه .. وقتاه .. ما نعرفش .. ما نعرفوش .. هوا جيست خيال .. كإنسان ما نعرفوش .. بالكشي نطلع غالطة فيه  .. حبيت نلمحلو قداش من مرة .. حبيت نلمحلو بغرامي حتى لو مش متأكدة منو .. حبيت نقلو هاني معاك احكيلي واشكيلي الي فيك .. حبيت نقلو وما نجمتش .. يمكن مازال بكري .. مش وقتو .. وليت نقلو كان فمة حاجة احكيلي انا ديما موجودة باش نسمعك .. وقتها ماشي في بالي باش يحكيلي على روحو على غرامو ، على دنيتو .. لقيتو يحكي على وحدة حبها ووحدة اخرة خانتو مع اعز صحابو خلاتو وخذات صاحبو .. في وسط الحديث عرفت الي انا ما عنديش بلاصة في حياتو .. حبيت نبعد لكن مالنهار الاول حسيت نهاري ناقص بلا بيه.